“Tazyiq va zo’ravonlik-kelajakka qilingan xavf”

  Jamiyat taraqqiyoti avvalo inson qadriyatlari va huquqlariga e’tibor bilan belgilanadi. Shunday bo‘lsa-da, bugungi kunda ham ayollar va bolalarga nisbatan tazyiq va zo‘ravonlik holatlari uchrab turibdi. Bu esa nafaqat oilaga, balki butun jamiyatga katta zarar keltiradi.
       Zo‘ravonlik tushunchasi keng ma’noga ega. U faqatgina jismoniy kuch ishlatish bilan cheklanmaydi. Ayollarga yoki bolalarga haqorat qilish, ularni mensimaslik, ruhiy bosim o‘tkazish ham zo‘ravonlik hisoblanadi.
        Ayollarga nisbatan zo‘ravonlik ko‘pincha oilada, yaqin insonlar tomonidan sodir etiladi. Bunda erkakning ayolni zaif ko‘rishi yoki uni o‘zidan past qo‘yishi muammo tug‘diradi. Natijada ayol o‘z huquqlarini himoya qila olmay qoladi.
        Bolalarga nisbatan zo‘ravonlik esa yanada xavfliroqdir. Chunki bola hali hayotiy tajribaga ega emas, u o‘zini himoya qila olmaydi. Jismoniy jazolar, qattiq so‘zlar, sevgining yetishmasligi bolada ruhiy jarohat qoldiradi va kelajakda uning shaxsiyati shakllanishiga salbiy ta’sir qiladi.
       Zo‘ravonlikning oldini olish faqatgina davlatning emas, balki har bir insonning vazifasidir. Agar biz yonimizda sodir bo‘layotgan adolatsizlikni ko‘rib ko‘z yumadigan bo‘lsak, bu muammo davom etaveradi. Oila a’zolari, qo‘ni-qo‘shnilar va butun jamiyat birgalikda zo‘ravonlikka qarshi kurashsa, natija ijobiy bo‘ladi.
       Xulosa qilib aytganda, ayol va bola – oilaning, jamiyatning tayanchi. Ularga nisbatan mehr, hurmat va e’tibor kuchaysa, kelajak yanada nurli bo‘ladi. Zo‘ravonlik esa faqat muammo, iztirob va kelajak avlodning ishonchsiz bo‘lib ulg‘ayishiga sabab bo‘ladi.

Baymatova Charos,
Qo‘shrabot tuman “Inson” IHM katta yoshdagilar va og‘ir ijtimoiy vaziyatga tushib qolgan oilalar bilan ishlash sho‘basi mutaxassisi.